تحرير ـ ميادة قاسم
هل سبق و دخلتِي مكان و لقيتي واحدة من أصحابك أو زميلاتك بتبص لكِ من فوق لتحت بنظرة مختلفة عن المألوف؟
لبستي فستان جديد وهي قالت «حلو» بصوت واطي وابتسامة صفرا؟
مدحوكِي في الشغل مثلاً وهي فجأة سكتت وبقت بتتكلم بطريقة جافة؟
لو الإجابة «أيوه»، فأنتِ مش بتتخيلي.. دي اسمها غيرة البنات، وهي أقوى وأخطر أنواع الغيرة على الإطلاق.
كلنا عشنا الموقف ده، سواء كنا اللي بنغير أو اللي اتغار مننا.
والأغرب إن أقرب الناس لينا هما أكتر ناس ممكن يحسدونا.. بس ليه؟
ببساطة لأن الغيرة بين النساء مش بتيجي من فراغ.. بتيجي من ٩ أسباب نفسية عميقة جدًا، هتعرفيهم دلوقتي.
١. مقارنة الجمال والمظهر الخارجي
المرأة بطبيعتها بتقارن نفسها بغيرها من أول لحظة.
شعرك أنعم؟ جسمك أرفع؟ بشرتك أفتح؟ ده كفيل إنها تحس إنها «أقل» منك حتى لو هي أجمل بكتير في عيون الناس.
٢. النجاح المهني والمالي
لما تترقي في شغلك، أو تفتحي مشروع ناجح، أو حتى تشتري عربية جديدة.. أول واحدة هتتضايق هي زميلتك اللي كانت بتحلم بنفس الحاجة من سنين.
٣. الزواج والحياة العاطفية المستقرة
مخطوبة أو متجوزة من رجل بيحبك وبيخاف عليكي؟
ده لوحده ممكن يخلي واحدة ممكن تحقد عليكي حتى لو بتحبك.
الغيرة هنا بتبقى من «الاستقرار» مش من الراجل نفسه.
٤. الأمومة و«الأولاد المثاليين»
أولادك شاطرين ومؤدبين ودرجاتهم عالية؟
خلاص.. أنتِ بقيتِ عدوة كل أم ابنها «مش تمام» في نظرها.
٥. السوشيال ميديا واللايف ستايل المثالي
صورتك وأنتِ في دبي ولا حتى في الكافيه الجديد؟ بوست الخطوبة؟ صورة الفستان اللي لابسته في الفرح؟ كل صورة بتكون سبب جديد للغيرة حتى لو ما حدش علّق.
٦. الثقة بالنفس والكاريزما الطبيعية
فيه بنات بتمشي الكون كله يبص لها من غير ما تعمل حاجة.
دي كاريزما ربنا ميزها بيها.. بين قوسين القبول ، ودي أكتر حاجة بتضايق البنات اللي بيحاولوا «يتصنعوا» الثقة دي وما بيعرفوش.
٧. الاهتمام والحب من المحيطين
لما الكل يحبك ويحترمك ويقدرك، فيه ناس هتحس إنها «مش ملحوظة» جنبك، فبدل ما تحبك أكتر، هتبعد وتتضايق.
٨. الجينات والوزن والشكل «الطبيعي»
واحدة بتاكل وما بتتخنش، أو بشرتها ناعمة من غير كريمات، أو شعرها كيرلي طبيعي.. ده كله بيخلق غيرة مرضية لأنها حاجة «ما بتتشراش».
٩. حتى «السعادة الحقيقية» بتكون سبب غيرة
أخطر نوع من الغيرة هي لما تكوني مبسوطة من جوا، بتضحكي من قلبك، عندك سلام داخلي، ومش شغلة بالك بحد .. فيه ناس بتكره المنظر ده لأنه بيفكرهم إنهم هما مش مبسوطين.
هنا بقى علم النفس بيقول إيه؟
د. كارين هورناي عالمة النفس الشهيرة، قالت: “الغيرة الأنثوية أقوى بكتير من الذكورية لأن المجتمع من وإحنا صغيرين بيربينا على فكرة إن «فيه ملكة جمال واحدة بس»
«فيه أجمل بنت في الفصل»
«فيه ست بيت شاطرة واحدة»
فالمنافسة بتبقى على كرسي واحد.. مش على مليون كرسي زي الرجالة.
إيه الحل؟
الحل في ٣ نصايح ذهبية لو عايزة تتخلصي من الغيرة أو تحمي نفسك منها:
احتفلي بنجاح غيرك بصوت عالي..
قولي «ألف مبروك يا قمر، تستاهلي كل خير».
ده بيقتل الغيرة عندك وعند الطرف التاني.
ابتعدي عن المقارنة تمامًا.
صدقيني كل واحدة ليها نصيبها وطريقها.
ركزي في خطتك أنتِ بس.
و لو حسيتي إنك بتغيري.. قولي بجد:
«يا رب ارزقني زيها وأكتر»
بدل ما تتمني زوال النعمة.
الدعاء ده بيغير حياتك.
في الآخر.. الغيرة دي فطرة، بس اللي بيحولها لسم هو القلب.
لو قلبك كبير، هتبقي مبسوطة لما غيرك يبقى أحسن منك.
ولو قلبك صغير، هتفضلي تتألم كل ما حد ينجح.
اختاري أنتِ هتبقي مين.. وماتنسيش يا جميلة إن الرسول عليه أفضل الصلاة والسلام قال ” لا يؤمن أحدكم حتى يحب لأخيه ما يحب لنفسه” .
