كتبت/زينب أيمن الكيلاني
كشفت الفنانة مي القاضي تعرضها لحملة تشويه منظمة استهدفت صورتها، مؤكدةً أنها بدأت بالفعل إتخاذ خطوات قانونية لمحاسبة المسؤولين عنها، موضحة أنها تفاجأت بنشر صور مفبركة لها بفستان مفتوح،تزامنًا مع إنتشار صور صممت بتقنيات الذكاء الاصطناعى للفنانة ياسمين عبد العزيز بعد طرح برومو مسلسلها الرمضاني الجديد “وننسى اللى كان”.
قالت القاضي خلال مداخلة هاتفية مع الإعلامية بسمة وهبة في برنامج “90 دقيقة” المذاع على قناة “المحور” : ” فى آخر أسبوع من عرض مسلسل 2 قهوة اللى كان مكسر الدنيا وكنت ناجحة فيه جداً، لقيت صفحات منزلالى صور تحديدًا صورتين غير لائقة ومكتوب عليها نفس الكلام فى نفس اليوم، ومنشورة ورا بعض، الفستان اللى موجود فى الصور كنت لبساه من 3 سنين في فرح لكن في الصور فتحوه زيادة عن اللزوم فاتصدمت”.
وتابعت مي القاضي : “جمعت كل الصور دى وخدت كل الإجراءات القانونية ضد الصفحات ومتأكدة أنه حد دافع ليهم ودي حملة ممنهجة عشان يعملوا كده وأنا معنديش أعداء تمامًا، ولكن ثقتى كبيرة فى القضاء المصرى والأجهزة المعنية”.
وعن المتسبب فى تلك الواقعة، قالت مى: “مين ليه اليد والمصلحة فى ده؟ أنا معنديش صحاب فى الوسط الفنى عشان يبقى ليا أعداء، وأنا شاكة أنه حد من أبناء جيلى ومقدرش أقول مين وفى دماغى أكتر من حد، وأخذت بالفعل الأجراءات القانونية ضد الصفحات دي”.
تأتي هذه الواقعة لتعيد فتح ملف “أخلاقيات الذكاء الاصطناعي” في الوسط الفني، حيث عانى مؤخراً عدد كبير من النجوم من عمليات الإبتزاز الرقمي وتزييف الصور والفيديوهات، مما دفع الكثيرين للمطالبة بتشريعات أكثر صرامة لحماية الهوية الرقمية للمشاهير.
