شريهان تعلق على مشاركتها في احتفالية افتتاح المتحف المصري الكبير
تحرير عبد الله طاهر
علّقت النجمة شريهان على مشاركتها في احتفالية افتتاح المتحف المصري الكبير، حيث قدّمت فقرة استعراضية مبهرة بعد سنوات من الغياب عن الشاشات، قائلة: «الشرف كله لي، ما فيش أعظم من النهارده.. ده تتويج لعمري ومسيرتي. أنا فخورة وسعيدة، وكنت مع أبطال مصريين عظام: محمد سعدي، وهشام نزيه، ومازن المتجول، والمايسترو هاني أباظة. مش عاوزة أنسى أي حد، لأنهم جميعًا عظماء».
وأضافت خلال مداخلة هاتفية ببرنامج «الصورة» الذي تقدمه الإعلامية لميس الحديدي على شاشة «النهار»: «مش عارفة ألمّلم مشاعري. دلوقتي عاوزة أصلي بقية عمري شكرًا وامتنانًا لله على هذا التتويج والشرف، لأنه شرف ما بعده شرف، على أرض بلدي».
وعن حضورها المبكر في الحفل، قالت شريهان: «أول صوت في الحفل كان صوتي قبل ظهوري، وبعدها فاجأت الناس. المتحف المصري الكبير حدث عظيم، والكل أتقن فيه. أنا مصرية وأتشرف بانتمائي لأقدم شعب في التاريخ، وأول حضارة، وأول جيش نظامي على وجه الأرض، وأول دولة في العالم لها تاريخ. الجمل دي قلب شريهان هو اللي كتبها».
وبالنسبة لإطلالتها، أضافت: «أول ما تشرفت باختياري في هذه المناسبة العظيمة، فكرت: مين اللي ممكن اسمه يتحط جنب الحضارة المصرية؟ ومين اللي ألبس منه وأكون فخورة وسعيدة؟ ومن يليق بمصر وتليق به مصر؟ لم أجد غير صديقي وحبيبي العالمي إيلي صعب».
وأكملت: «رحت له وقلت له: أنا محتاجاك نحفر خط على حجر، لو اتحط جنب الحضارة المصرية يليق بها. وكان الوقت ضيق لأنه مشغول، والقماشة تطريزت في إيطاليا بالشغل الفرعوني. كل حلمي أن يكون الحجر المصري نفسه هو اللامع.»
واختتمت شريهان تصريحها قائلة: «قلت لإيلي صعب: الأمانة اللي أنا شايلها كبيرة وأكبر مني بكتير، أنا مين أكون جنب الحضارة المصرية؟ لكنه منحني القوة وقتها. أنا فخورة جدًا.»
