كتب محمد أشرف
بصراحه، اللي بيتعمل جوه القوات المسلحة خلال الفترة الأخيرة يستحق كل احترام وتقدير.
الفريق أول عبد المجيد صقر عامل شغل جامد جدًا، وبيتحرك بخطة واضحة وهدوء تام من غير ما يحتاج يعلن أو يشرح، وده دليل على إنه راجل عسكري حقيقي من الطراز الرفيع.. النوع اللي بيشتغل في صمت، بس نتائجه بتتكلم لوحدها.
النهارده لما قال
أمن مصر وسلامتها أمانة في رقابنا.. وعندما يتواجد الخطر على حدود مصر هنا يأتي دورنا
الكلمة دي لوحدها تلخص عقيدة الجيش المصري كلها.. إحنا مش بنجري ورا صراعات ولا بندخل حروب مالهاش لازمة، بس أول ما الخطر يقرب من حدودنا أو أمننا القومي، الجيش بيبقى أول خط دفاع وآخره
تفتيش الحرب اللي اتعمل النهارده على واحدة من تشكيلات المنطقة المركزية العسكرية بيورّينا حجم التطوير اللي وصلنا له.
دي مش كل القوات، ده جزء بسيط من تشكيلات المنطقة بس! تخيل إن القوة دي لوحدها تعتبر جيش متكامل!
الانضباط، الجاهزية، الشكل، التنظيم.. كله كان على أعلى مستوى
اللي يستحق كمان التحية هم الناس اللي ورا الكاميرا — الفرع الإعلامي للقوات المسلحة سواء في الاستخبارات العسكرية أو الشئون المعنوية.
الناس دي شغالة على توصيل رسائل قوية جدًا، بعضها موجه لبرّه برسالة ردع ذكية جدًا، وبعضها موجه لجوّه عشان يطمن الناس ويزود الثقة في جيشنا
الطريقة اللي بيعرضوا بيها قوتنا فعلاً بقت احترافية، ومش مبالغ لما نقول إنها بقت في مستوى جيوش عظمى زي أمريكا وروسيا والصين
اللي حاصل جوه القوات المسلحة مش مجرد تطوير.. دي نقلة حقيقية في الفكر، في التنظيم، وفي طريقة التعامل مع كل تحدي.
إحنا عندنا جيش بيبني قوته في صمت، وبقيادة وطنية بتفكر بعقلية جديدة، وده هو سر القوة الحقيقية
فخور جدًا بجيش بلدي العظيم وبكل راجل واقف بيحمي ترابها
